អន្តរជាតិ៖ ប្រធានាធិបតីអ៊ុយក្រែនលោក Volodymyr Zelenskyy បានចុះហត្ថលេខាលើកិច្ចព្រមព្រៀងសន្តិសុខមួយជាមួយប្រទេសអាល្លឺម៉ង់កាលពីថ្ងៃសុក្រនៅឯរដ្ឋធានីប៊ែរឡាំង (Berlin) ដែលការចុះហត្ថលេខានេះត្រូវបានសាទរជាខ្លាំងដោយលោកអធិការបតី Olaf Scholz ដោយបានហៅកិច្ចព្រមព្រៀងនេះថាជា "ជំហានជាប្រវត្តិសាស្រ្ត" សម្រាប់ការគាំទ្រដល់រដ្ឋាភិបាលអ៊ុយក្រែនក្នុងការតតាំងជាមួយសង្គ្រាមដ៏ក្តៅគគុកប្រឆាំងនឹងប្រទេសរុស្ស៊ី។

ក្រៅពីការចុះហត្ថលេខាកិច្ចព្រមព្រៀងជាមួយអាល្លឺម៉ង់ លោក Zelenskyy ក៏នឹងត្រៀមចុះហត្ថលេខាលើកិច្ចព្រមព្រៀងមួយស្រដៀងគ្នានេះបន្ថែមទៀតជាមួយប្រធានាធិបតីបារាំង ខណៈដែលលោកកំពុងព្យាយាមស្វែងរកជំនួយគាំទ្រដល់កងកម្លាំងរដ្ឋាភិបាលអ៊ុយក្រែនដែលកំពុងតស៊ូដើម្បីទប់ទល់នឹងការវាយប្រហាររបស់រុស្ស៊ីលើសមរភូមិជួរមុខនៃទីក្រុង Avdiivka។

ស្របពេលដែលសង្គ្រាមនៅលើទឹកដីអ៊ុយក្រែនកំពុងឈានចូលដល់ឆ្នាំទី៣ ប្រធានាធិបតីអ៊ុយក្រែនបាននិងកំពុងស្វែងរកការគាំទ្រជំនួយប្រកបដោយនិរន្តរភាពជាមួយនឹងហិរញ្ញវត្ថុ និងសព្វាវុធនៅឯសន្និសីទសន្តិសុខទីក្រុង Munich ប្រទេសអាល្លឺម៉ង់ ជាវេទិកាប្រមូលផ្តុំនៃមេដឹកនាំកំពូលៗរបស់ពិភពលោក ដែលក្នុងនោះគេក៏ឃើញមានវត្តមានរបស់អនុប្រធានាធិបតីអាមេរិក លោកស្រី Kamala Harris ផងដែរ។ ដំណើរទស្សនកិច្ចក្នុងទ្វីបអឺរ៉ុបរបស់លោក Zelenskyy ធ្វើឡើងនៅចំពេលដែលអ៊ុយក្រែនកំពុងប្រឈមមុខនឹងសម្ពាធកាន់តែខ្លាំងលើសមរភូមិជួរមុខនៅភាគខាងកើត ដែលញាំញីដោយសារតែបញ្ហាកង្វះគ្រាប់រំសេវ និងការវាយប្រហារថ្មីៗបន្ថែមពីរុស្ស៊ី។

ផែនការនៃគម្រោងជំនួយរាប់ពាន់លានដុល្លារនៃប្រទេសលោកខាងលិចមកកាន់អ៊ុយក្រែន ហាក់ស្ថិតក្នុងភាពស្រពិចស្រពិលនៅឡើយ ខណៈម្ចាស់ជំនួយគាំទ្រដល់អ៊ុយក្រែនដ៏ធំបំផុតគឺសហរដ្ឋអាមេរិកកំពុងជាប់គាំងក្នុងដំណាក់កាលត្រៀមបោះឆ្នោតជ្រើសរើសប្រធានាធិបតីអាណត្តិថ្មី។ ជាក់ស្ដែង កញ្ចប់ជំនួយយោធាដែលមានទំហំទឹកប្រាក់ចំនួន ៦០ពាន់លានដុល្លារអាមេរិក កំពុងជាប់គាំងនៅឡើយគិតចាប់ពីឆ្នាំ២០២៣ មកដោយមិនអាចឆ្លងយោបល់ឯកភាពពីសភាបាន។ 

បើតាមលោកអធិការបតីអាល្លឺម៉ង់បញ្ជាក់ថា កិច្ចព្រមព្រៀងសន្តិសុខដែលបានចុះហត្ថលេខាកាលពីថ្ងៃសុក្រ បង្ហាញពីជំហរមិនរាថយរបស់អាល្លឺម៉ង់ចំពោះការគាំទ្រលើអ៊ុយក្រែន។ លោកក៏បានប្រកាសភ្លាមៗផងដែរពីការផ្តល់កញ្ចប់ថវិកាជាជំនួយយោធាទំហំ ១,២ពាន់លានដុល្លារអាមេរិកទៅកាន់អ៊ុយក្រែន។ កិច្ចព្រមព្រៀងនេះក៏បានដាក់ចេញនូវការគាំទ្រផងដែរសម្រាប់អ៊ុយក្រែន ក្រោយបញ្ចប់សង្គ្រាមបច្ចុប្បន្នដើម្បីកសាងកងទ័ពដ៏ទំនើបមួយដែលអាចទប់ទល់នឹងការវាយលុកណាមួយពីរុស្ស៊ីនាពេលអនាគត។ ក្នុងឱកាសនៃការចុះហត្ថលេខាលើកិច្ចព្រមព្រៀងនេះ លោក Zelenskyy បាននិយាយថា៖ "កិច្ចព្រមព្រៀងសន្តិសុខរបស់យើងគឺជាឯកសារប្រវត្តិសាស្រ្តទ្វេភាគីយ៉ាងពិតប្រាកដដែលមិនធ្លាប់មានឡើយពីមុនមក៕